Пагадненне аб супрацоўніцтве з Самарскім дзяржаўным універсітэтам шляхоў зносін
- Апублікавана 06.07.2023 13:32
Супрацоўніцтва нашага ўніверсітэта з Самарскім дзяржаўным універсітэтам шляхоў зносін (СамДУШЗ) пачалося 10 гадоў таму з падпісання адпаведнага пагаднення.
Час і развіццё ўніверсітэтаў не стаяць на месцы: пашыраюцца перспектывы, з'яўляюцца новыя магчымасці і формы ўзаемадзеяння. Таму сёння, 6 ліпеня 2023 года, у час пасяджэння стратэгічнай сесіі «Расія-Беларусь. Адукацыя. Навука. Трансфер тэхналогій», якая праходзіць у Нацыянальнай Акадэміі навук Беларусі, рэктары БелДУТа Кулажэнка Ю.І. і СамДУШЗ Гаранін М.А. падпісалі абноўленае Пагадненне аб супрацоўніцтве паміж універсітэтамі.
Сфера дзеяння Пагаднення – функцыянаванне сістэм сярэдняй спецыяльнай, вышэйшай, паслявузаўскай (навукова-арыентаванай адукацыі), падрыхтоўка высокакваліфікаваных спецыялістаў з сярэдняй спецыяльнай і вышэйшай адукацыяй, бесперапыннае павышэнне кваліфікацыі работнікаў, інтэграцыя адукацыі і навукі ў Рэспубліцы Беларусь і Расійскай Федэрацыі.
У сваім выступленні падчас пасяджэння сесіі Юрый Іванавіч адзначыў спецыфіку транспартнай адукацыі ў цэлым і спецыфіку адукацыйнай і навуковай дзейнасці БелДУТа. Запрасіў да супрацоўніцтва ўстановы і прадпрыемствы рэальнага сектара эканомікі Расійскай Федэрацыі.
