Трынаццаты выпуск афіцэраў!
- Апублікавана 20.06.2020 20:42
20 чэрвеня 2020 года ў жыцці выпускнікоў ваенна-транспартнага факультэта ўстановы адукацыі «Беларускі дзяржаўны ўніверсітэт транспарту» надышоў той момант, якога яны чакалі з нецярпеннем пяць гадоў - атрыманне доўгачаканых афіцэрскіх пагонаў. Але, азірнуўшыся назад, здаецца, што праляцелі яны за адно імгненне…
Урачыстая цырымонія трынаццатага выпуску афіцэраў ваенна-транспартнага факультэта традыцыйна прайшла на плошчы Перамогі горада над Сожам.
У цырымоніі выпуску афіцэраў узялі ўдзел прадстаўнікі мясцовых органаў улады, сілавых структураў горада, рэктар універсітэта, кіраўніцтва Дэпартамента транспартнага забеспячэння Міністэрства абароны і, вядома ж, ветэраны.
У сваім віншаванні выпускнікам начальнік ваенна-транспартнага факультэта палкоўнік Аляксей Паддубны адзначыў, што завяршэнне іхняй вучобы, знамянальна праходзіць у год 75-годдзя Перамогі савецкага народа ў Вялікай Айчыннай вайне. І ўсе выпускнікі, як і ўвесь афіцэрскі склад факультэта, павінны быць вартыя ратных подзвігаў тых, хто вызваляў і абараняў, захінаў уласную незалежнасць, суверэнітэт і тэрытарыяльную цэласнасць Рэспублікі Беларусь.
Сёлета 20 выпускнікоў факультэта атрымалі дыплом дзяржаўнага ўзору.
Прадстаўнік заказчыка, начальнік Дэпартамента транспартнага забеспячэння Міністэрства абароны генерал-маёр Шаплаўскі Юрый Мікалаевіч у сваім віншаванні выпускнікам выказаў упэўненасць у тым, што ў войсках яны пакажуць рэальны і паўнавартасны вынік усяго таго, чаму іх навучылі. Вынік годны выпускніка ваенна-транспартнага факультэта.
Кіраўніцтва транспартных войскаў цвёрда перакананае, што аўтарытэт маладых афіцэраў у войсках будзе наўпрост залежаць ад атрыманых тут ведаў, ад прафесійнага стаўлення да службы і, ў канчатковым выніку, ад адданасці прафесіі абаронцы Айчыны!
Выкладчык кафедры агульнавайскавой падрыхтоўкі
маёр Яўген Вінічэнка
Фота Алены Белавус
Нашли ошибку? Выделите ее и нажмите Ctrl-Enter