Сустрэча з галоўным інспектарам аддзела ідэалагічнай работы Брэсцкай мытні Верай Уладзіміраўнай Базакай

Апублікавана 16.12.2024 16:01

• Мытная справа

У пятніцу 13 снежня 2024 года ўніверсітэт і кафедру «Мытная справа» наведала выпускніца спецыяльнасці «Мытная справа» 2019 года Вера Уладзіміраўна Базака.

Пасля заканчэння навучання на першай ступені Вера Уладзіміраўна працягнула навучанне ў магістратуры, якую паспяхова скончыла ў 2021 годзе. Таксама яна двойчы была пераможцай Рэспубліканскага конкурсу навуковых работ студэнтаў і атрымала падвойную перамогу на конкурсе «Транспарт будучыні» – у Беларускім дзяржаўным універсітэце транспарту і ў Расійскім універсітэце транспарту.

Акрамя таго, Вера Уладзіміраўна доўгі час з’яўлялася ўдзельніцай народнага ансамбля танца «Палескія зоры».

Сёння Вера даслужылася да звання інспектара мытнай службы 1 ранга і займае пасаду галоўнага інспектара аддзела ідэалагічнай работы Брэсцкай мытні.

На працягу дня Вера Уладзіміраўна наведала студэнтаў другога, трэцяга і чацвёртага курсаў, расказала пра розныя аспекты працы ў мытных органах, асабліва падкрэсліўшы тое, чым цікавая гэтая праца.

Многія аспекты сваёй будучай службы хвалююць студэнтаў не толькі выпускных, але і малодшых курсаў, таму практычна кожны з амаль 90 студэнтаў задаў пытанне, якое датычыцца асаблівасцяў службы ў мытных органах, праблем, якія могуць чакаць маладога спецыяліста падчас яе нясення, а таксама – арганізацыі вольнага часу і побыту.

Вера адказала на гэтыя шматлікія пытанні, а самым актыўным студэнтам уручыла памятныя падарункі.

Студэнты былі вельмі ўражаныя і адзначылі, што такія сустрэчы вельмі матывуюць, і дзякуючы ім праца ў мытні ўяўляецца хоць і адказнай, але вельмі прывабнай.

Кафедра «Мытная справа» дзякуе сваёй выпускніцы Веры Уладзіміраўне Базака за праведзеную сустрэчу і спадзяецца на далейшае супрацоўніцтва.

Кафедра «Мытная справа»